oca in forno
Come cusinar l´oca in forno co´ gnente.
Te ocore ´na oca intiera ben curada, lavada e sugada.
´Na masoca de aio par ogni do chi´i de oca.
Un bel pugno de fo´ie de salvia.
Un mestoeto de acqua par ogni do chi´i de oca.
Sal, ma poco, poco, ´pena ´na s-cianta.
- E sì! Gó anca rason de protestar. Ti, soto ´a piova, co´a machina strisa´a, te me gá portá l´oca squasi curada, disendome che, se gera el caso, dovevimo metarla in congeator. E mi, gó pensá ben de invitar me fia e Miche´e a far festa. Par farla curta, par el disnar de unquó. E a´ora de´a to oca deso resta qualche rosegoto, par cui, protesto!
- Masimo condireno ´na pastasuta. ´E patate al forno co l´onto par mi e xe ´na proibision, ma squasi, squasi. Do, tre! Par gradir!
- E che mi, de mio, gó fato ´a torta de banane, noxe e canea, anca quea vegnua proprio ben che Miche´e, ´sto ostia, se ne gá portá casa meza.
- ´A Ana, ieri sera ´a me pareva ciapada in contropiè par l´invito ai fioi e ´na oca da finir de curar e cusinar. Invece unquó ´a gera proprio contenta par el risultato. ´A gá seguio ´na riseta nova, mai provada prima, e ´a gá coto l´oca al forno fin dopo mezanote, dopo ´na bata´ia par finir de curarla, che ´a me preocupava prop´io.
- Invece l´oca xe stá un resultato da 10 e lode. Squasi a pari co´a me torta!
- Me gero dito ieri sera che Ana, par via de cusinar, ´a xe rivada al masimo de´a senplificasion.
- Dopo esarse scana´a co´a bestia da curar, a ´a gá pozada su´a piastra del forno. Mi, ció, ghe gavevo netá parfin do masoche intiere de aio. Ea ´a ghe ga meso ´sti tocheti de aio drento e soto ´a bestia. Un pugno de foie de salvia spenando ´a piantina sul balcon de´a cusina. Do mestoi cei de aqua raversai su´a piastra. E mesa ´a piastra in forno a 200 gradi, ma anca 220, dipende dal forno. Gnente altro de gnente! Par quatro ore, un´ora par chi´o ´a me gá spiegá.
- Xe vegnù ´na oca rosta tenara, no onta, un butiro! Co qualche crostesina de pe´e da inbalsamarse. El ricordo de ´na frisiga!
- E no ghe ne xe praticamente restá.
- Miche´e me gá domandá da dove che vegneva l´oca. Me xe vegnù da rispondarghe: "dal 1959 e zo de eá. Robe de scuo´a."
- Dopo gó avuo el dubio che no´l gavese capio masa, ma no inporta, che xe vero che tra nealtri i tenpi che conta i xe questi. E anca ´e origini de´a nostra amicisia. Che beo!
- ´Sto trevisan de dentro ´e mura el me piase prop´io. Magari no el sará giusto, ma che me inporta a mi. No fa che me faso ´a pagina in internet: "l´oca in forno".
- Tute ´e imagini, loghi, audio, video e fail de testo, riprodoti qua, i ´partien ai so rispetivi prop´ietari.
- Tuti i deriti i xe riservai.
- Tute que´e altre imagini originai, i loghi, audio, video e fail de testo i xe copirait © 2008 de Mario Ma´aguti
- Tuti i deriti i xe riservai.
- Nome del dominio: MA´AGUTI.ORG
- Dominio registrà l´8 Lu´io 1998 04:00:00 UTC
- Richiedente el dominio: Mario Ma´aguti
- Posision de´a pagina: http://www.malaguti.org/racc/tv/oca_in_forno.html
- Reaizada in data 30 Otobre 2008 a´e ore 07,00
- Ultimo agiornamento in data 24 marso 2009 a´e ore 09,43
- Tuti i deriti xe riservai.
- ´Sta pagina xe Vaida come HTML 4.01 Strict e Vaida come CSS!
- Par promovar Oiram el me blog!
- e par promovar marioma´aguti el me secondo blog!