Io vole apprender iste techica!          Un premissa importante Iste pagina nasce per messages publicate in Interling, un lista que io practica ab le 1998. Le contributores tracta de un technica pro publicar paginas web que non me es familiar. Oh Deo! Tote iste materia me es poco familiar e io es un webmaster multo dilectante. Totevia io non debe disperar. Il es del tempore que io frequentava le schola que on me dice: "Sape tu Mario? Con le tempore e con le palea matura le mespilas!" Mespila, fructo del mespilo, ab latino mespilu(m), ab greco méspilon, de origine preindoeuropee, in le proverbio vole indicar un realitate que necessita de multe patientia pro ganiar un resultato sactisfacente. Le caso mie, ab mi prime annos, sin remedio. E dicite isto, intertanto io hic copia le texto per alteres autores e, forsan, con le tempore, io potera dicer le mie. Le origine Per : Ado Hall ado_hall@YAHOO.COM.AU In : INTERLNG@MAELSTROM.STJOHNS.EDU Objecto : nove aspecto(s) pro le GI Data : Fri, 16 Aug 2002 10:57:45 +1000 Car amicos Vole ben vider le nove presentation del version retiari del 'Grammar of Interlingua' a http://members.optusnet.com.au/~adohall. Illo es un specie de version "beta" del sito. Si vos usa IE5 o Netscape 6 (o plus alte), prova le nove stilos (aspectos), accessibile in le lista cascadente (sub 'cambiar stilo'). Si vos usa IE5+, vos videra que le selection actual de stilo resta quando on cambia le pagina. Nota etiam le possibilitate de examinar le navigation in le secunde nivello sin quitar le pagina actual. E pois, si il vos place, da me vostre responsas. An io poterea ameliorar le presentation? In le septimana sequente io addera breve notas e explicationes re le version retiari al pagina de entrata. Cordialmente Edo. Le interesse de un altere parte del mundo Per : Emerson José Silveira da Costa ensjo@RECEITA.FAZENDA.GOV.BR Data : Fri, 16 Aug 2002 08:52:20 -0300 (Ensjo prende su mento que ha cadite al solo.) Uau, Edo, illo es simplemente SEN-SA-TIO-NAL. 8-O~~~ Isto demonstra ben le potential del folios de stilo, que permitte cambiar drasticamente le apparentia de un documento sin necessitate de cambiar le documento ipse. E le documento es ben facite, de maniera que illo appare ben mesmo in un navigator que non supporta folios de stilo. (Me ha impressionate specialmente le option "blanc e blau", ubi le contento del pagina appare como quadros [frames] distincte.) Edo, tu poterea inviar me le files in un archivo .zip, a fin que io los studia? Io solo lamenta le facto que le option de selectionar stilo non appare in mi navigator Opera. :-) "In awe", :-) Ensjo. Le responsa Per : Ado Hall Data : Mon, 19 Aug 2002 06:33:32 +1000 Enjo ha scripte: > Uau, Edo, illo es simplemente SEN-SA-TIO-NAL. 8-O~~~ Multe gratias pro tu responsa amabile e incoragiante. Tu appreciation me importa multo. Tu laboro como maestro del sito UMI (in particular le codification per PHP del IED) e como habilissime traductor de poemas e contos, ha essite un grande inspiration. > Isto demonstra ben le potential del folios de stilo, que permitte cambiar drasticamente le apparentia de un documento sin necessitate de cambiar le documento ipse. Si, ecce un del grande avantages del placiamento de elementos in un pagina Web per folios de stilo, super le placiamento per cellulas de tabula. Io encoragia omnes a usar le folios de stilo non solo pro le presentation de texto, sed etiam pro le position de elementos. In facto le clave a iste typo de construction de paginas web, es le separation complete del contento ab le presentation (o stilo). Assi, le mantenimento, actualisation, revision etc del sito es multo plus simple. > E le documento es ben facite, de maniera que illo appare ben mesmo in un navigator que non supporta folios de stilo. In facto, mi prime passo in le construction de tal paginas es le creation de un pagina multo basic con un hierarchia clar de elementos e un ordine logic, que funge ben in Netscape 3. Si on reguarda le fonte de un pagina qualcunque in le GI, on videra quasi solo le texto ipse involvite in le familiar etiquettas - h1, h2, h3, p, a (h r e f) div e span. Il es le classas attachate que determina le aspecto. Lo que manca es le massa de cellulas sin texto (e.g. < ! - - < t d h e i g h t = c o l s p a n = r o w s p a n = > & n b s p ; < / t d > - - > e < ! - - < t d > < i m g s r c = " s p a c e r . g i f " h e i g h t = w i d t h = etc) e tabulas annidate, que on trova in le majoritate de paginas Web commercial. > (Me ha impressionate specialmente le option "blanc e blau", ubi le contento del pagina appare como quadros [frames] distincte.) Le nove GI non es le primo a offerer stilos cambiabile. Nonobstante, le tendentia es a cambiar solo un restringite numero e extension de faciettas - le color del bordos o titulos, o un imagine de fundo o le typo del texto. (Vide pro exemplo http://www.zeldman.com.) Io voleva "pulsar le frontieras" un pauc. In particular io voleva permitter differente manieras de rolar le texto principal. In le option 'orange e blau', le texto principal e barra inferior rola insimul con le barra superior, ben que in le option 'orange e gris', le texto principal e barra inferior rola independentemente del barra superior. In le option "blanc e blau", como tu ha remarcate, le texto principal rola independentemente de omne altere divisiones. Pro crear le tres manieras differente de rolar le pagina, on debe divider omne elementos (preter le navigation) inter duo grande "receptaculos" con un largor de 100%, e celar le 'overflow-y' del pagina. > Edo, tu poterea inviar me le files in un archivo .zip, a fin que io los studia? Certo, illo serea un placer. Io revide ancora le codification del javascript, a causa de errores que appare in IE3. Io tentara de finir cello iste vespere e inviar le archivo deman. Vide etiam le articulo de Paul Sowden 'Alternative Style' (2 November 2001) a http://www.alistapart.com . Io ha prendite le mechnismo principal pro le cambiamento de folios de stilo ex iste articulo excellente. A proposito, io recommenda celle sito a omnes qui se interessa del presentation de paginas Web integremente per le normas (standards) XHTML e CSS. > Io solo lamenta le facto que le option de selectionar stilo non appare in mi navigator Opera. :-) Si, isto me ha attristate un pauc. Le navigator 'Opera' me place multo. Tamen il ha mancos critic in su interpretation del DOM (modello del objectos in un documento) e del specification CSS1 (folios cascadente de stilo). Pro exemplo, Opera non comprende 'overflow:auto' le proprietate e attributo que permitte le rolamento de elementos (tal qual 'div' e 'span' e 'p'). E on pote acceder (attinger) ni le proprietate CSS 'display' per javascript, lo qual es fundamental a iste systema de navigation expandibile e contrahibile, ni le attributo 'alternate' in le ligamines al folios de stilo, lo qual permitte le cambiamento de folios de stilo. Lo que etiam poterea interessar te es le technica que io ha disveloppate pro le navigation. Essentialmente, le menu se construe in cata pagina ab un parve serie de arrays* (ordines/matrices) de entratas. Si un entrata consiste de plus que un parola, le parolas es separate per sublineas. Un sol entrata determina le URL, le ID e le texto del parola(s) cliccabile que appare in le menu. Il ha altere systemas de navigation que se construe ab arrays, sed istos exige differente entratas pro le URL e le texto del ligamine. Io me ha servite de un function que reimplacia un sublinea per un spatia pro crear etiam le texto del sol entrata. E in comparation al menu hierarchic e dynamic publicate in 'webreference.com' que appare in plure sitos, mi codice es multo plus breve, super toto pro que io restringe le function de celamento e revelation de elementos navigational a navigatores que se conforma al normas actual, (e ergo pote acceder elementos in le pagina per 'document.getElementById'). Bon studio. Io spera que tu potera applicar alcun de iste technicas a tu paginas. Amicalmente Edo Interlingua

Page: http://www.malaguti.org/ia/pe/0208210.html
Last updated Wednesday, August 21, 2002 05:25. Copyright © 2002 by Mario Malaguti
All Rights Reserved.