| Prefacio
Preparar discursos public exige multe recerca e labor, e quando le autor constata le facto regrettabile que un considerabile parte del humanitate es absente in su auditorio, ille accepta con satisfaction le opportunitate de publicar los in forma imprimite pro attinger etiam le absentes. . .
Le presente opusculo ha le scopo de presentar nostre analyses de alcun aspectos de problemas interlinguistic e del utilisationes practicate o potential de Interlingua.
Le prime discurso, serviente como un sorta de introduction, es un presentation in anglese, a AILA 81, le 6e Congresso International de Linguistica Applicate, in Lund, Svedia, in le anno 1981, del historia de Interlingua.
Le discursos sequente esseva omnes presentate al Conferentias International del Union Mundial pro Interlingua (UMI). Durante iste conferentias se incontra le Consilio de UMI e un numero restringite de collaboratores active, dunque il non se tracta de grande congressos.
Il es nostre spero que iste discussiones pote esser interessante etiam pro linguisticos professional, considerante le probabilitate que interlinguistica essera in le futuro un specialitate plus importante del linguistica applicate que hodie.
Prof. Leland B. Yeager es professor de scientias economic al Universitate de Auburn, Alabama, S.U.A., e autor de plus que 100 publicationes de su specialitate. Sed Dr. Yeager es etiam un polyglotto remarcabile e un interlinguistico habilissime, e io me senti honorate per su permission de includer duo de su discursos re interlinguistica.
Le protagonistas de Interlingua es conscie del facto que le introduction de un idioma international non va "salvar le mundo", non mesmo ab omne problemas linguistic, sed nos es certe que Interlingua es un contribution efficace al solution de multe problemas de communication.
Pro un persona non-initiate a Interlingua, qui lege textos, le sol question relevante post le lectura es, si o non le lector ha recipite le information que nos vole transmitter!
Nostre gratias cordial a Sres. Bent Andersen e Arne Pedersen pro haber apprestate le typografia de iste libro!
Ingvar Stenström
Approfundamento: Como leger Interlingua.
|
